1Th 3 | DOB | STEP | Tuta nina Ateni 'ena 'amiyami 'a'ate'atesa'ala manumi, 'enega yaloina ga yagwae, “Timoti 'itatauya Tesalonaika ta 'ateluwa namo bada 'amiyami.”

1 Thessalonians 3

1 Tuta nina Ateni 'ena 'amiyami 'a'ate'atesa'ala manumi, 'enega yaloina ga yagwae, “Timoti 'itatauya Tesalonaika ta 'ateluwa namo bada 'amiyami.” 2 'Enega tasidana Timoti yaetunenawa, manuna tauna wate 'ebweu 'ama boda, Yaubada 'ina guinuwa Keliso tetelina manuna. Tasidai nina yaetunenawa be 'igiepa'alimi be Keliso 'ena wada emisa 'ai'aila, 3 be 'enega geya'abo 'imi 'elouyao 'ediya waneeneta. Manuna miyamwau nidi wamwalamwalatoni 'aene maibo'ada talobalobadi. 4 Manuna lowa 'abo'ama ma'emiyao tamiyami, ga 'agimisimana 'emiya 'aene miyamwau nidi 'emiya sida apwesa, ga gete tuga ni'atu siapweapwesa.

5 Gete 'alena 'enega yanuwanuwa wawasae, ga Timoti yaetunenawa be 'imi emisa 'ida 'ita, be tetelimi 'ida me'e 'eguya, manuna ya'atesa'ala Seitani 'enaya, 'abona nai 'ebetoo sinabwana 'i'ebwa'emi be waneneneta, be 'enega 'ima paisewa lowa 'emiya 'igie to'umaliye.

6 'Enega Timoti nina 'iwai ga tetelimi 'ime'ena, 'igwae, “Me Tesalonaika nidi Keliso 'ena siemisa 'ai'aila, ta oboboma 'aledi, ta wate tuta maibo'ana 'ida ayausa nuganuganina sinuwanuwa'i'isi ma idi gwausowala, ta nuwanuwadi be sida 'italimada.” 'Abo'ama wate nadigega nuwanuwama be 'omi 'a'italimami. 7 Gosemao 'anabwa'ayoi ma ima 'elouya, be ma ima miyamwau, ta 'imi emisa tetelina ni'atu 'anonona ga 'igiegwausowalima. 8 'Enega 'imi toolopa'ala 'Inapwana manuna 'ama lotoona 'ibobo'ana.

9 'Enega 'ima lokagutoki Yaubada 'ena nigeya sawesawenaya 'alosa'u, manuna Yaubada 'ena 'ima gwausowala manumi sinabwa wawasae. 10 'Enega boiboi be 'asiyata 'ediya 'asidasida waiwai be 'aene maninimi 'a'ita limadi, be wate 'abo 'eisa 'ebe neneta 'emiya simiyami 'ediyega 'ada giewaiwaiyemi.

11 'Enega 'igu nuwanuwa 'eluwa getedi: Nugana 'aene Tamada Yaubada be 'ida 'Inapwana Yesu 'ima 'eda sida loine be 'enega 'ada wa 'emiya. 12 Ta 'eluwena 'aene 'Inapwana obobomega 'ida loemaemi be taumimo wada eoboobobomemi, ta wate mali tomota wada oboboma 'ai'ailidi, nadigega 'abo'ama 'aoboboma 'esemi, 13 be ma'etamo tuta nina 'ida 'Inapwana Yesu, ma 'ana toemisao siapwesama, 'omi ma imi waiwai, ta ma 'ate'esasemi, Tamada Yaubada matanaya wada toolo.